Ang babae sa Pagdaralita

Ang Babae sa Pagdaralita ni Joi Barrios

Maria Josephine Barrios o mas kilala sa pangalan na “Joi Barrios” sa kanyang mga akda. Nakamit niya ang kanyang doktorado sa Filipino (Literature) sa Unibersidad ng Pilipinas noong 1998. Kilala rin si Barrios bilang isang makata, aktibista, tagasulat ng senaryo, artista, translator at guro. Sa kasalukuyan ay isa siyang visiting professorsa Philippine Studies Program ng Osaka University of Foreign Studies at kasapi rin siya ng Congress of Teachers and Educators for Nationalism and Democracy (CONTEND).

Ang Babae sa Pagdaralita

Joi Barrios

Babae akong sinasakmal ng kahirapan

Kahirapan na mistulang

Ahas sa damuhan,

Maliksi ang galaw,

Nagbabadya ang nakasangang dila,

Makamandag ang kagat

Pumupulupot ang ulupong,

Itong paghihikahos sa aking katawan

At tumatakas ang lakas,

Nakatitog ang walang talukap

Na mga mata ng sawa.

Nanlilisik,

Pagkat batid na walang palya

Sa paghatid ng lason

Ang pangil ng pagdaralita.

Anong gagawin ng babae sa kanyang karukhaan?

Tumawag kaya kay Darna?

Lipad Darna, Lipad?

Kristala,Kristala, kami ay iligtas!

Zsazsa Zaturnnah,

Palayain kami, Mama!

Huwag,huwag.

Ang paglaya sa hirap,

Ay wala sa bayani ng pantasya.

Nasa ating mga babae ang pakikibaka!

Kung paanong sa gabi at sa araw

Ay wala tayong humpay sa paggawa,

Kung paanong magkasabay na lumalaban

At nag-aaruga

Matibay ang dibdib pagkat mapagkalinga

Ang ating pag-ibig

Sulong at makibaka!

Tagpasin ang ilo ng sawa !

Ang kahirapan ay maiigpawan

Kung ipaglaban na ang pagbawi

Ang pang-angking muli,

Sa yaman ng bayan

Ay ating karapatan.

Sulong,makibaka,lumaban!

·         Ang kayarian ng Tula ay nasa Malayang Taludturan dahil walang sinunod na sukat at hindi sinaalang alang ang tugma sa bawat taludtod.

Teoryang Sosyolohikal

-          Dahil ito ay tumatalakay  sa mga karanasan ng tao sa iba’t – ibang kalagayang panlipunan, pampulitika, pangkultura at pangkabuhayan.

Patunay:

                        “Babae akong sinakmal ng kahirapan na mistulang Ahas sa                                       damuhan, maliksi ang galaw, magbabadya ang nakasangang dila, makamandag ang kagat

Teoryang Historikal

-          Ang layunin ng Panitikan na ito ay ipakita ang karanasan ng isang lipi ng tao na siyang masasalamin sa kasaysayan at bahagi ng kaniyang pagkahubog.

Patunay:

                        “Kung ipaglalaban na ang pagbawi, ang bayan ay ating karapratan, sulong, makibaka, lumaban!

v  Pangkalahatang pagpapaliwanag

               Ang kahirapan ay parang isang traydor na maaring maging sanhi ng ating kamatayan kung tayo ay walang ibang gagawin at hahayaan natin nalang natin na tuluyang maghirap at mamatay. Pero tayo bilang isang babae hahayaan nalang ba natin na tuluyan tayong lamunin ng kahirapan? Marami tayong magagawa upang matamasa ang kaginhawaan sa buhay.